Главная Спорт Александр Поликарпович Алексеев ураты дьоҕурдаах теннисис уонна ырыаһыт этэ…

Александр Поликарпович Алексеев ураты дьоҕурдаах теннисис уонна ырыаһыт этэ…

1 min read
0
0
1

          Александр Поликарпович Алексеев  ураты дьоҕурдаах теннисис уонна ырыаһыт этэ...

Амма Покровкатыттан төрүттээх-уустаах, сүһүөҕүнэн 1-кы группалаах имбэлиит буолан баран, остуол тенниһигэр Саха АССР икки төгүллээх чөмпүйүөнэ, Россия имбэлииттэрин алта төгүллээх чөмпүйүөнэ, Саха Өрөспүүбүлүкэтин үтүөлээх артыыһа, үгүс омук дойдуларыгар гастролларга сылдьан ыллаабыт Саха сиринээҕи Гостелерадио солиһа Александр Поликарпович Алексеев 75 сааһын туолуутун кэриэһигэр анаммыт өрөспүүбүлүкэ остуол тенниһигэр турнира “Кыайыы 50 сыла” спорт Дыбарыаһыгар 200-кэ кыттааччылаах үрдүк тэрээһиннээхтик ыытылынна.  

          Александр Поликарпович Алексеев  ураты дьоҕурдаах теннисис уонна ырыаһыт этэ...

            Ааспыт үйэ 60-80 сылларыгар көбүс-көнөтүк тутта сылдьан, остуол тенниһигэр хаҥас илиитин тоҥолоҕун аллараа өттүнэн эрэ оонньуур Александр Алексеев күүстээх утарсааччыларын хотуталаан, үгүс көрөөччүлэри, ыалдьааччыларын сөхтөрөрө. Үрдүк тенор куоластаах иэйиилээх ырыаһыт сцена бөдөҥ маастара этэ.

            Александр 1944 сыллаахха кулун тутар 15 күнүгэр Амма оройуонун Покровкатыгар Екатерина Даниловна, Поликарп Николаевич Алексеевтарга күн сирин көрбүтэ. Биирдэ Алексеевтарга кэлэ сылдьар билэр киһилэрэ баара-суоҕа 11 ыйдаах уолчааны үөһэ быраҕатаан хабыалаан холустук «таптаан», алҕас муостаҕа мүччү ыһыктыбыта. Биир дойдулаахтарын үтүө сыһыаннарынан бигэнэн, имбэлиит уолчаан тулалыыр эйгэни, кэрэни өйдүү улааппыта. Айылҕаттан айар, өйдүүр дьоҕура сайдыбыта. Киинэҕэ ылланар ырыалары үтүктэн ыллыыра. аккардеоҥҥа оонньуур учуутал Мансур Ганеевич Габибулин уонна биллиилээх музыкант, хормейстер, концертмейстер, аккомпаниатор Анатолий Александрович Черемных чороччу улаатан эрэ уолчааны ырыа умсулҕаныгар уһуйбуттара.

            Александр Поликарпович кылгас гынан баран чаҕылхай олоҕу олорбута.

            1965 с. Дьокуускайдааҕы музыкальнай училищены, 1974 с. Мусоргскай аатынан Ураллааҕы консерваторияны  бүтэрбитэ. Саха сиринээҕи Гостелерадио хоругар солиһынан үлэлээбитэ,онтон үөрэммит училищетыгар вокалга преподавателлээбитэ.

            Олоҕун анаабыт сөбүлүүр көрүҥнэригэр ситиһиилэр кэлэ тураллара.

            1976 с. Сочига сэбиэскэй ырыалары толоруу Бүтүн Россиятааҕы конкурсугар Лауреат үрдүк аатын ылбыта. 1988 с. Саха АССР үтүөлээх артыыһын аата иҥэриллибитэ. 1990-с сылларга Москваҕа Шаляпин кэнсиэригэр, консерватория Улахан Саалатыгар ыллаабыта. Опера ырыаларын, романстары эҥкилэ суохтук толортуура. Өрөспүүбүлүкэ артыыстарын гастроллуур бөлөхтөрүгэр киирсэн, АХШ Нью-Йорк, Бостон, Нью-Джерси, Манчестер, Вашингтон, Ноян куораттарынан, Гардвардскай университекка, ХНТ саалаларыгар, ыраас күүстээх куолаһын иһитиннэрбитэ. Францияҕа, Австрияҕа, Монголияҕа тапталлаах Сахатын сирин музыкальнай искусствотын билиһинэрбитэ. ССРС аатырбыт концертмейстера Елена Образцовалыын, Грузия народнай артыыһа Важа Чачавалыын бииргэ айымньылаахтык үлэлэспитэ.

            Остуол тенниһинэн 16 сааһыттан сөбүлээн дьарыктаммыта. Төһө да уҥа илиитэ хамсаабат, сиһэ, санна хамсаабат да буоллар, хаҥас илиитин тоҥолоҕуттан аллара өттүн хамсатан, олус сатабыллаахтык оонньуура. Бырааттыы Доҕордуураптары, Шварц курдук маастардары, маастарга кандидаттары кыайталыыра. Дьокуускай куоракка биэстэ бастаабыта, Дальнай Востогу кыайара, Россия имбэлииттэрин ортолоругар алтата, Саха сиригэр иккитэ чөмпүйүөннээбитэ. Бэйэтигэр кытаанах ирдэбиллээҕэ, киһи быһыытынан истиҥ, судургу майгылааҕа. Общественнай тренер быһыытынан оҕолору теннискэ дьарыктаабыта, хамаанда тэрийэн соҕуруу күрэхтэһиилэргэ сырытыннартыыра.

          Александр Поликарпович Алексеев  ураты дьоҕурдаах теннисис уонна ырыаһыт этэ...

            Бииргэ үгүстүк алтыспыт көлүөнэ биир күүстээх теннисискэтэ, Саха сирин, Дальнай Восток хас да төгүллээх чөмпүйүөҥкэтэ, Саха Өрөспүүбүлүкэтин остуол тенниһигэр Федерациятын салайан кэлбит, билигин Федерация Бочуоттаах президенэ, «Барҕарыы Национальнай Фондатын» дириэктэрэ Альбина Иннокентьевна Поисеева истиҥник, иһирэхтик ахтар:

  • «Киһи саныы-саныы сөҕөр эрэ уонна дьэ, кырдьык, итэҕэйэҕин – имбэлииттэр санаалара күүстээҕин, кыайыахпыт диэн оонньуулларын. Билигин оонньуу сылдьар теннисистэргэ Александр Поликарпович сүрдээх улахан холобур буолар. Иккиһинэн, кини ылсыбыт үлэтигэр, тенниһигэр даҕаны, ырыатыгар даҕаны, барытыгар бастыҥ буолан баран, аны оҕолору иитэр. «Факел» диэн кулуубу тэрийэн хас эмэ сыл общественнай төрүккэ тренеринэн буор-босхо үлэлээн, республикабыт күүстээх теннисистэрин Дьокуускай куораттан таһаартаабыта. Мин Александр Поликарповиһи кытта 70-80-ус сылларга Дьокуускайга, республика күрэхтэһиитигэр, Дальнай Востокка Находка куоракка биир хамаандаҕа оонньуурбут. Уонна кини биһиэхэ Чурапчыга күрэхтэһиилэргэ тахсан көрдөрөр этэ. Көрөөччүлэр бары сөҕөллөрө – бу түргэнин, бу сыыспатын, доруобай, киэҥ далааһыннаахтык оонньуу сылдьар спортсменнары баһыйа тутаттыыра. Оннук бэйэтин бэйэтэ дьарыктаан, бэйэтэ адьас туһунан техниканы көрдөрөн, ол иһин даҕаны Россияҕа кинини наһаа ытыктыыр, сөҕүмэр кыайыыга дьулуурун, дьарыктанарын, бэйэтэ туһунан техниканы айбытын бары сөҕөр этилэр».

          Александр Поликарпович Алексеев  ураты дьоҕурдаах теннисис уонна ырыаһыт этэ...

Александр Поликарпович Алексеев кэриэһигэр аналлаах остуол тенниһин турнирыгар 181 күрэхтэһиэхтэрин баҕалаахтар кэлбиттэр. Улахан дьон, ветераннар уонна имбэлииттэр уон остуолунан тарҕанан, барыта 706 көрсүһүүлэргэ сытыы оонньуулары көрдөртөөтүлэр.

39 диэри саастаахтарга Василий Румянцев, Михаил Кылабысов, Владислав Тимофеев; Марфа Колодезникова, Ольга Тихонова, Айыына Петрова; ветераннарга: 40-54 саастаахтарга Артур Слепцов, Михаил Спиридонов, Семен Павлов; 40-59 саастаахтарга Александра Тутаева, Сахаайа Карпова, Татьяна Куркина; 55-69 саастаахтарга Алексей Гоголев, Аркадий Иванов, Николай Киприянов; 60-н үөһэ Евдокия Староватова, Евдокия Другина, Августина Исакова; 70-н үөһэ Радомир Сидоров, Семен Васильев, Кузьма Колосов; доруобуйаларынан хааччахтаахтарга Марк Васильев, Степан Константинов, Николай Николаев, Елизавета Матвеева, Екатерина Сивцева, Сандра Слепцова, туһааннааҕынан, бастакы уонна бириистээх миэстэлэргэ тигистилэр.

Саха Өрөспүүбүлүкэтин физическэй культураҕа уонна спорка Министиэристибэтин пресс-сулууспата

          Александр Поликарпович Алексеев  ураты дьоҕурдаах теннисис уонна ырыаһыт этэ...

Загрузить больше публикаций
Загрузить еще от Григорий Гаранов
Загрузить еще в Спорт

Смотрите также

Шах и мат! Якутские шахматисты стали победителями II этапа летней Спартакиады школьников России

22 мая 2019 В Якутске в стенах Республиканского шахматно-шашечного центра завершились соре…